Mundartbeitrag von:

Grünwald Karl    -
5700 Zell am See
karl.gruenwald@aon.at

S´Klotznbrot

A Klotznbrot,is jo oin bekonnt,
bei ins dahoam im Pinzgalond.
Und wos ma braucht dazua
und wia ma`s mocht,
üba des ho i ma Gedankn gmocht.
Davo wer i ench hiaz wos sogn,
und es tats übas Klotznbrot wos dafrogn.
An Haufn Zoig brauchst do dazua,
wei drein sei ko do goa nia gnua.
De Klotzn,wißt`s es eh,de deschtn Birn,
de muaßt im Wossa drei zerscht sian.
Nochan brauchst dazua de pickatn Feign,
woi nit ois a Gonza,de tuast kloa schnein.
Döschte Zwetschkn ghörn a no drein,
mögn scho grod a nettla sein.
Bei de Hoslnussn,grod so noch Gfü,
de oan mögn weniga,de oan mögn vü.
Aranzini,Pignoli und Zewebn,
wia`s a jeda tuat so mögn.

da Honig tuat no oiss vasiassn
und a wench an Rum soitst a no drübagiassn.
An Toag den derf ma nit vagessn,
sunst konnst des Zoig jo eh nit essn.
A Mö,a Soiz,de Bria va de Klotzn und an Germ,
A wench an Honig,a poar Nökn,nochan werscht er scho wos wern.
Hiaz muaß da Toag no a Boisei steh,
wei er soit a bissl in d`Hech no geh.
Wonn er bei da Schissl üban Rond aussischaut,
nocha konnst`n hernemma,do is nix mea vahaut.
Des gonze Zoig hiaz druntamischn,
Strizei mochn und no feicht vawischn.
In Ofn werns hiaz eichegschobn,
dass a wos wern,vielleicht no lobn.

Und wennst gonz ruhig bist und loost so zua,
nochan merkst,in Ofn drei do is koa Rua.
grod a so a Mettn tans mochn,
In Toag drei de guatn Sochn…
de Klotzn schrein,mia san de größtn,
de Feign glei drauf,oba mia de bestn.
hiaz rian se drauf a de Zewebn,
mia tan den Gschmock erscht richtig hebn.
de Nußn glei,vo hintn,vorn und in da Mittn,
mia ärgan de Leit a wench,de mit de Drittn.
und a de Zwetschkn mischen se drein,
durch ins werscht des Brot erscht richtig fein.
gonz kloalaut de Aranzini,is jo wou,
mia san aussa ench jo a no dou.
da Honig siaß,wia er hoit is,
den guatn Gschmoch moch i,des is gwiß.
de Pignoli stehn auf,jo mea wia stoiz,
ohne ins wa`s Brot woi nix,wos woit`s.

a Bois loos i scho zua,möt se da Rum,
durch mi,moan I,werd`s es a Bissl dumm.
gonz schoaf mischt se da Toag hiaz ein,
i hoff,es werscht a Rua boid sein.
hescht`s endlich auf do drein zan streitn,
ohne mi lagat`s eh umadum in da Strahleitn.
auf oamoi nemman se oi in Oarm,
in Ofn drein,wo`s is sche woarm.
Und flüstan se gonz leise zua,
es entsteht jo direkt a heilige Rua.
oi zom moch ma hiaz de Leit a Freid,
in Klotznbrot drein,in da Weihnachtszeit...