Heimat
von Basilius (Silli) Oberhauser

Heimat, wos is des, i ku enks nit sogn,
a jeda sichts ondascht, tuast d Leit danach frogn.
Heimat, fi den oan is des s Lond, is des Toi,
da nachste moat, des alloa is auf gor koan Foi.
Heimat, des is, wo di nu griaßn de Leit,
Heimat is des, wo s de Freind nu geit.
Heimat is doscht, wo dei Elternhaus steht,
wo ma aus Kind in de Schui nu geht.
Wia weascht des Wort Heimat decht strapaziascht,
boid ma a so de Zeitunga studiascht.
Heimatroman und heimattreu,
a Heimatliad is fi koan mea neu.
Da Heimatdichta foit mia nu ei,
heimatlos ku glei oana sei.
Und host spata amoi für allwei dei Ruah,
deckn´s de nu mit Heimaterde zua.
Heimat kennt weda arm oder reich,
Heimat is decht für an jedn gleich.
Heimat is de Wüste, is a Stodt, Berge und Eis,
Heimat gibts für jedn, ob schworz oda weiß.
Heimat is doscht, wo mia iatz grod lebn,
a Heimat muaß ob a fi de Auslända gebn.
Heimat, wos is des, i ku enks nit sogn,
Heimat muaßt oafoch in dir inna trogn.

Kontakt:
Basilius (Silli) Oberhauser
A-6322 Kirchbichl
oberhesi@gmx.at