Mundartbeitrag von:

Lahnsteiner Gertrud    -
4802 Ebensee
Gertrud26@sms.at

Schau da zua

Was hoaßt des schon: Jetzt schau da zua?
Zum Hern kriagst de Wort wahrlich gnua,
mitm Sehgn hat´s sicher ah was z´toan,
Bedeutung hat´s nuh mehr, ih moan.

Oft hoaßt´s: Pass auf guat, dass d´nit fallst,
patz dih nit an, wann´st isst und malst.
Schau zua, dass d´nuh in Zug dawischt
und dass d´an Fisch ah fangst, wann´st fischt.

Jetzt schau da zua, d´Zeit bleibt nit stehn,
es soll halt ah was weitergehn,
beeil dih, des is damit gsagt,
da denk dran, wann dih d´Faulheit plagt.

Da schau da zua, sonst wirst nuh krank,
wann´st müad bist, sitz dih auf a Bank,
schau zua, dass d´dih nit ü´bermachst
und dass d´, wann´st ernst sein sollst, nit lachst.

Wüst heiratn, dann schau da zua,
ob d´Liab dazua is wirklich gnua,
denn wann de Sach dann schief dir geht,
dann stehst nuh da und schaust recht bled.

Mitm Geld, da sollst da zuaschaun ah,
teil da´s guat ein, des is nit schwa,
denn wann´st dein Konto überziahgst,
kinnt sein, dass d´dann Probleme kriagst.

Jetzt schau da zua, dass d´nix verlierst
und dass d´dih nit verspekulierst,
pass auf, dass d´nit ins Schleudern kimmst
und dass d´dih ah nit übernimmst.

Wann´s kompliziert wird, schau da zua,
wann da was z´vü wird, suach dein Ruah,
und sei nit kopfert und nit stur,
befolg den Rat und schau da zua!