Publikationen
Veranstaltungen

Der beste Beitrag wird als "MundArt des Monats" auf dieser Seite und im EuroJournal veröffentlicht!

Aus unserer Mundartdatenbank

Texte - Gedichte - Märchen
Beiträge in und zur Umgangssprache

MundArt des Monats Autor / Beitrag anmelden Veranstaltungen
Links

Mundartbeitrag von:

Glawischnig Werner    -
9620 Hermagor
glawischnig.59@aon.at



Alle Mundartautoren
Mundart-Datenbank

Die Prophezeihung!

In unsan Bekonntnkreis,
do gibt‘s ane von de Fraun,
de will da um jedn Preis,
in dei Zukunft eineschaun.
Sie hot ma heute prophezeiht,
meine Sterne stehen schlecht
und de Planetn war‘n folsch gereiht
und mehr Vorsicht warat recht.
Und heint war gonz a schlechta Tog
sogt de Urschl noch dazua
und weil i heint trotzdem ausgeahn mog,
geah i hiaz fuart bis in da Fruah.
I glab jo sowos nia im Leben
de Hex, de konn mi bucklkraxn,
so an Unsinn konn‘s nit gebn,
hear ma auf mit solche Faxn.
I foahr hiaz mit mein Auto ause,
de Prophezeihung schon vageßn
i man da Teifl mocht ka Pause
auf amol is a Hund do auf da Stroßn gseßn.
I will kann flochn Hund nit hobn
und lond wegn ihn im Stroßngrobn.
I hob hiaz grod füar mi gedocht,
es kummt ma fua, da Hund hät glocht.
Er hät jo ollen Grund dazua,
i woar hiaz da dumme Bua.
I hätt daham bestimmt nix gsogt,
de Hex, de hot dos promt dafrogt.
Sie quasslt wieda von den Sternen,
sie hät ma dos jo prophezeit
und i tat heint nix daraus lernen,
i warat jo so obagscheit.
Sie redet noch von an Valußt,
lei wos es is, hot se nit gwußt.
Zornig sog i drauf zu ihr,
soll i mi daschlogn wegn dir.
Du tuast de Leit lei tamisch mochn,
desholb paßian so blede Sochn.
De spinnt jo, sog i noch zu mir
und renn glei ause bei da Tüar.
Wos soll i hiaz noch dazua sogn,
i hob mi wieda holb daschlogn.
De Stufn hob i gonz schlecht gnumen
und bin mit‘n Gsicht zan liegn kumen.
Zwa Zänt seint hiaz in hohen Bogn,
aus mein Kiefa ausegflogn.
Im nochhinein woar‘s ma bewuß,
meine zwa Zänt, woarn da Valust.
Mei linka Hax woar a gebrochn,
de Hex, de hot den Brotn grochn.
I hear se eh schon obn kichan,
klingt wia vom Nochbagaul dos Wichan.
Sie plappert wieda wos von Krieg der Sterne,
i höar‘s noch schmerzvazerrt aus weita Ferne.
Hiaz reißt mia dächtan de Geduld,
i schrei hiaz laut von untn aufe,
an oll‘n host lei du de Schuld
du bist a Hex schon seit da Taufe.
Und weil i goar so damisch woar,
sogt se mit hocherhobnen Händn,
dei Pech, dos is für heite goar,
dein Schicksal wird sich sehr bald wendn.
Sie hot sogor an Lottsexa prophezeiht,
dos sorgt trotz Schmerz, füar Heitakeit.
Sie sogt sogoar de Zohl on
und schreibt se ma noch auf,
i sog ma noch, is eh nix dron
und pfeif auf ihre Zohln drauf.
Den Schein, den hob i goar nit gnumen
i hob holt leida drauf vageßn,
am Sonntog, wia de Zohln kumen,
seint olle sexe richtig gwesn.
I war vor Schreck beinohe gstorbn,
hiaz woar dos gonze Joahr vadorbn.
Jetzt beweist mir selba diese Gschicht,
glaub an die Sterne, denn sie lügen nicht!


 Mundartdatenbank - Gesammelte Beiträge von Mundartautoren und Lesern zum Nachlesen!