Mundartbeitrag von:

Sumper Gabriela    -
4040 Linz
gabi.sumper@gmail.com

Liabsbriaf aun meine Kina...

Wia jed's Joah deng i Tog fia Tog
wos i de Kina scheng
weu ois, wos i so kaufa mog
is MIA irgandwia z'weng

I moa, i loss fia Heia sei
kauf nixi aus am Gschäftl
de Kina wean se vüh meah g'frei
üba a söbst g'schriems Heft'l

Dös wichtiga steht do daunn drin
wia narrisch gern i's hob
wia donkboa i dem Christkind bin
fia jedn neichn Tog

den i mit eana bin beinaund
und das's mi glickli mochan
weus san, wias san, mit Herz, Vastaund
an austeckadn Locha.

Ois is a Söbstvaständlikeit
das g'sund san, das ea guat geht
das g'scheit san, und voi Heazlikeit
das brav san, und net unstet.

I wissat goa net wos i tat
bet hoamli in mein Heaz drin
und bitt in Herrgott um de Gnad
waun a wen hoid, das's I bin.

Des ois schreib i ma von da Sööh
und leg eas untan Christbaum
de Zeit vageht so furchtboa schnööh
zan red'n bleibt fost koa Spüraum.

Wos fia an Seg'n, wos fia Freid
hob i mit meine Kina
i kennt oi Tog, und net nur heit
a Lobliad dafia singa.