Mundartbeitrag von:
Wiplinger Peter Paul -
1030 Wien
wiplinger@web.de
Alle Mundartautoren
Mundart-Datenbank |
A Bitt, A rechts Gwiaks, A Zeitvatreib
A Bitt
nedda
a weng zuwilegn
zu dia loß mi
damit i dei heaz
gschpia
und vüleicht
a du meins
A Liabschoft
heast
d’hollablia
blian gonz narrisch
und i hob nua di
in mein bluad
sog
gschpiast mi du a
A rechts Gwiaks
affi und aowe
umi und oari
und da weg
is volla stoana
und d’fiaß
san scho miad
und d’nocht
kimmt a boeuid
oeuso schaun ma
daß ma hoamkeman
i und mei roß
A ZEITVATREIB
do schwimm i
und schwimm i
so dahi im wossa
schau auffi
in blauen himmö
und deng ma dabei
jessas na
wia schee des is
so z’schwimma im wossa
und se säwa dabei
gschpian wia a fisch
so leicht und so frei
und deng ma a nu dabei
nana da Tod ist nu weit
is nu weit wegga vo mia
und long soiss nu dauan
bis a mi hoid und nu oft
mechat i so schwimma
wia hiazt
im woaman wossa
bei so an woiknlosn himmö
und i winsch ma
daß oiss nu long so bleibt
wias jetzt grod mit mia is
|
