Mundartbeitrag von:
Sumper Gabriela -
4040 Linz
gabi.sumper@gmail.com
Alle Mundartautoren
Mundart-Datenbank |
Wintaobnd
Waunns wieda finsta wiad und koid
und waunns an Rauhreif kriagt
oft kimmt de Zeit fia jung und oid
wos uns in'd Stubma ziagt
Je mehras voa de Fensta blost
je stülla wiads herin
und druckt da Schnee auf jedn Ost
druckts uns im Heazn drin.
A Kauz klogt trauri ba da Nocht
grod so ois tat a woana
s'klingt fost so wia a Woidandocht
mia losn,- redn tuat koana.
D'Hoizscheida gliahn und krochan stad
sinnierad schaut ma zua
d'Erinnarung kummt daunn auf spad
und innandrin is Ruah.
Im Feierschein denkt ma an d'Leit
de nimma bei uns san
wia scheh das's wa und wos fia Freid
waunns unta uns nu wan.
Da Blick geht ume, hi ins Eck
wo kloane Kina spühn
du meakst, im Lebm hot oiss sein Zweck
es Laude so wia d'Stühn.
Zan Dosei gheat a s'Sterm dazua
und tuats a nu so weh
Noch ana Nocht kimmt wieda Pfruah
und du siagst d'Sunn aufgeh.
|
