Mundartbeitrag von:
Fischer Wilhelm -
4650 Lambach
wilhelm.otto.fischer@gmx.net
Alle Mundartautoren
Mundart-Datenbank |
S Lebmsglick
Du frogst mih:
Wos host van Glick, dös kuaz nua wäahrt,
aa waunns dih sölig mocht,
wiads dar afd letzt daunn doh zaschteeart,
gaunz schnö, oft iwa d Nocht?
Ih sog da:
Und wars aa grod a Augnblick,
wosd glickli woarst, denk drau,
es is und bleibt jo doh dei Glick,
dös da neamd nehma kau.
Mei Eafoahrung sogt ma:
Hiatzt bin ih scho an oida Mau.
Wos hot mei Lebm mih gleahrt?
Ned dös, wos ih ma leistn kau,
mei Lebm - dös is mei Weart.
Aus lauta kloane Augnblick,
dös woass ih heit genau,
setzt sa sih zaumm mei Lebmsglick.
So iss! Ih gfrei mih drau.
|
