Mundartbeitrag von:

Fischer Wilhelm    -
A-4650 Lambach
wilhelm.otto.fischer@gmx.net

Dö Biakn drausd in Goatn

Dö Biakn drausd in Goatn is
a richtigs Vogöparadies.
In dera treibm in gaunzn Summa
sih Vogömusikantn umma.

Dö Aumsl singt Koloratua.
Da Buachfink tiriliat dazua.
Dö Moasn zwitschat volla Lust.
Da Spotz ziapt aa mit schtoiza Brust.

Dö Östan schmettat wia d Trompetn.
Da Schpecht schreit Atonalitätn.
Da Ringötauba guarrt schee brav
schtakato zuawö dö Oktav.

In hochn Ton pfeift maunchmoi noh
da Schpeaba af sein Piccolo.
Schee singt da Schtieglitz und ea schillat,
daweu da Gimpö kunstvoi trillat.

Dö Schoa eagänzt nuh dö Braunön.
Da Kleiba deaf af koan Foi föhn.
Und s Rotköhlchen piepst seit da Fruah
mit seina zoatn Stimm dazua.

Oiss mitanaund is, wia mas heat,
dös scheenste Vogögsaunskonzeat.
Af dö Weis homma, und dös gwiess,
a hearrlichs Vogöparadies

in insra Biakn, drausd in Goatn,
mit üwa fufzehn Vogöoatn. . . . .
Und wos toan mia? - Mia gebm a Ruah
und loosn dera Musi zua.