Mundartbeitrag von:

Glawischnig Werner    -
A-9620 Hermagor
glawischnig.59@aon.at

Dos schlonk sein is lei schwar!

Da Koarl, dea is a früha Rentna,
und wiegt beinohe schon zwa Zentna.
Er is zu dick fürs fortgeschrittnes Olta
und braucht füa seine Kilo, an eigenen Vawolta.
Er schnauft jo schon, wonna lei a Stiagn sigt
und wonna auf da Pritsch liegt.
Ka Wunda, dosa solche Zentna hot,
er ißt jo fost von fruah bis spot.
Zan Frühstück mindestns vier Eia,
Schinkn kan, dea is zu teua.
Vier Semmln und drei Toas dazua,
do hota man i noch nit gnua.
Zan Mittogessn zwa drei Schnitzl,
dazua Kartoffl und a Striezl.
Zan trinkt reicht a Kistn Biea,
do denk im ma, dos packta nia.
und noch da longen Mittogspausn,
brauchta dringend noch a Jausn.
Do gibts an Speck, an Kas a Wurscht
und fünf Bierlan noch füarn Durscht.
Dos Obndessn neama weit,
auf dos er sich schon richtig gfreit,
do ißt er heite beim Chinesn,
do is ollweil guat zan essn.
Er tuat nit gern aufs Essn woartn
und bestellt quer durch de Speisekortn.
Wos do da Korl olls so vadruckt,
doß goar da Wirt mit seine Oxln zuckt.
Er ißt und trinkt ols wia besessn,
olls hät da Orme wochnlong nix gessn.
Bei der Menge kummts auf jedn Foll,
zu an Klintsch mit seina Goll.
Eh schon voll bis obn hin,
zigts ihn noch zan Kastl hin
zwa Sacklan Chips, konna dawischn
und follt glei hin zan Telewischn.
Hiaz konna neama sitzn, neama steahn,
hiaz miaßata zan Dockta geahn.
Dea schaut den Koarl vazweiflt on,
wosa do sigt, konna goar nit fossn,
dea hot a Zentna Fettn dron,
den konnst hiaz neama lafn lossn.
Da Orzt vaschreibt a Nulldiät,
ols wenn da Koarl dos nötig hät.
Und weil da Tscharli mehr ißt ols füar zwa,
reichts holt nit füar F. T. H.
Er schreibts auf, dos da Koarl jo nix vagißt
und irrtümlicherweise trotzdem weita ißt.
Wos er noch zan essn kriagt,
dos schreibta goar nit mit,
und wos vom Kühlschronk ausfliagt,
do reicht a gonzes Kochbuach nit.
Er kriagt ka Schmolzrot ,kane Schnitzl,
kane Semml, kane Stritzl.
Kane Bier, ka Schokolade,
kane Steaks, ka Marmelade.
Lei an Opfl jedn Tog,
den er sowieso nit mog.
De Eia und da Kas seind gstrichn,
dos weard mit Wossa ausgeglichn.
Nur so wearst wieda schlonka wearn,
da Koarl, vanimmts und fongt glei on zan blean.
I hob bisher den gonzn Tog,
ollweil lei gessn, wos i mog,
hiaz sollt i lei mehr Äpfl essn
und a sunst lei hoarte Sochn,
jo host den du hiaz gonz vagessn,
wos soll i denn hiaz stottn Essn, mit meina vieln Freizeit mochn?
Do denkt da Karli, jo füar wahr,
dos schlonk sein, dos is wirklich schwar!