Publikationen
Veranstaltungen

Der beste Beitrag wird als "MundArt des Monats" auf dieser Seite und im EuroJournal veröffentlicht!

Aus unserer Mundartdatenbank

Texte - Gedichte - Märchen
Beiträge in und zur Umgangssprache

MundArt des Monats Autor / Beitrag anmelden Veranstaltungen
Links

Mundartbeitrag von:

Schlegel Evelyn    -
4020 Linz



Alle Mundartautoren
Mundart-Datenbank

Des Puppenhaus

Stö da vur, i kenn a Frau, de woit launge Zeit koan Mau.
Koana woa da Lilli recht, olle, olle woans ihr z’schlecht.
Ihr Tochter hot scho ewig gwoat, und hot zu da Mama gmoat:
„Mei Papa wü mi eh nia segn, jetz bring an neichn, bitte schen.“
Da hot die Frau augnzwinkand glocht und Togs drauf hots a scho oan brocht.
Mit an wüdn Boat und launge Hoa, und Klamotten, dass zum Grausn woa.
Des Medl hot‘n amoi gsegn, und hot‘n glei von Herzn megn.
Nur d’Oma hot de Händ zaumgschlogn und hot ned gwusst, wos soi sie sogn.
„Mei Tochta hot an Rübezoi, des geht ned guat, auf goa koan Foi.
I gspias, mei kloana Finga juckt, und wia mei rechtes Auge zuckt.
Der bringt uns boid de Polizei, i hoff, des is gaunz schnö vorbei.“
Daun nimmts den Schwiegasohn in spe, kurz auf d’Seitn und tuat eam sche.
„Du hurch amoi, du junga Mau, die Lilli wü oan, der wos kau,
und oan der brav a Göd hoambringt, oan der sie kümmat um ia Kind.“
Er nickt und sogt daun nua: „Aha“, und foat kurz drauf daun auf Montage.
Die Lilli is a weng perplex, de Oma kichat wia a Hex.
Aun jedm Obnd ruaft a au, und sogt, se geht eam furchtboa oh,
und d’Oma moant:“A so a Höd, s’Telefoniern kost so vü Göd.“
Und oamoi frogt a daun ’es Kind, obs füa Weihnochtn het wos im Sinn.
Ea mecht ia gern a Packal schickn, gaunz aufgeregt kaunns east nua nickn,
und piepst daun leise wia a Maus:“I wünsch ma nua a Puppenhaus.“
Er sogt „O.K., des is geritzt!“, und d’Oma de hots niedagsitzt.
So vagengan Tog und Necht, wo er öfter aunruafn mecht.
Oba d‘Oabat nimmtn her, und Bastln kummt nu hintaher.
D’Kollegn höfn eam wos geht, die Zeit vageht und es wiad spät.
Do dreiredn lasst a se ned gern, des Puppenhaus soid oanzig wern.
De Lilli sitzt beim Telefon, de Oma grinst und sogt voi Hohn:
„Do siagst as jetzt, do host as eh, i moan, der hot a Aundare.“
Oba de Lilli und ia Kind hean auf sowas goa ned hin,
und er, er werkt und baut und klopft, hot genau a Büd im Kopf.
Er mocht ois wia a sis denkt, Vorhäng, Betten, Tisch und Schränk,
a Küch, an Lift, a Clo, a Bod, zum Oschickn wiads laungsaum zspot.
Mocht nix, daun foats express mit da Bau, daun kummts nu oiwei rechtzeitig au.
Er wüs vapockn und weil a nix siacht, foid eam ei, da föd a Liacht.
Obwoi eam a Freind hüft mit Birndln und Drot, meakt a dass a koa Zeit nimma hot.
Weihnochtn kummt, die Lilli reat, sie hot seit Togn von eam nix gheat.
De Oma mocht an Freudntaunz, nua des Medl vatraut eam gaunz.
Gegn Mittog piepst des Handy laut,die Oma hots vom Sessl ghaut.
So kuaze Zeit voam Weihnachtsfest, schickt a jetzt a SMS.
EILZUG KOMMT UM 1 UHR AN. SUCHT NACH KLEINEM GRAUEN MANN,
STEIGT AUS ZUG AM BAHNSTEIG 2 UND HAT DAS PAKET DABEI.
Oma schreit:“Wos foit eam ei? Wos wiad des füa oana sei?
Der wiad se ins Fäustchen lochn und nu goa a Gscheft draus mochn.“
Lilli sogt nix, pockt des Kind, und se foan zum Bahnhof gschwind.
D’Oma de sitzt hintn drin, Schlimmes geht ihr durch den Sinn.
„Woats nua o, da kummt nix au, und scho goa koa kloana Mau,
oda er is, des gibt’s a, oana von da Mafia.“
Da Zug, der foat am Baunsteig ei, vü is los, a muads Krawäu,
und do hintn, de Tia geht auf, ea steigt aus, und wia a schnauft,
da kloane Mau mitm Paket, und sei Frau, de nebm eam geht.
D’Lilli eut schnö hi zu eam, „Gib Obocht!“ heat ma d’Oma plean.
Do, plötzlich werdns olle pockt, so schnö, dass erst moi neamd wos sogt.
Di Oma schreit:“I hob nix tau! Des is ois nua wegn dem Mau!“
Da Polizist sogt, dass vom Zoi, a Aunruaf woa, zwecks da Kontroi.
Beim Eisteign hots so schnö sei soin, hot oana s’Pakl mitgebm woin.
A Mau mit Boat und launge Hoa, und koana hot gwusst wer des woa.
Der hot auf den kloan Mau eigredt und eam in d’Oam druckt des Paket.
Jetzt stengans olle do und schaun, koana mecht se jetzt wos traun.
A Polizist kniat hin und nickt:“I hobs gwusst, i heas dass tickt!“
Durch die Menge geht a Schrei:“Des wiad doch ka Bombm sei!“
De Oma und de kloane Frau, de schrein laut:“Mia hobm nix tau!“
„Do is mei Puppnhaus nua drin“, sogts Diandl, do es hot koan Sinn.
Koana heats und siacht wias flennt, da Entschärfungsdienst kummt grennt.
Zu dritt stengans ums Pakl umma, ma siacht de Schweißpedln scho kumma.
Aum Baunhof is mucksmeisalstü, wei kona wos vapassn wü.
Da oane klopft, da aundre hurcht, der dritte ziagt leicht aun da Schnua.
Laungsam tuat a weg s’Papier, geht daun vorsichtig in d’Knia.
Olle san staad, ma heats im Takt, gaunz deutlich mochts :TICK TACK TICK TACK.
Do schreit die Oma:“Wöche Not! I hobs gwusst, glei samma tot!“
Da Polizist steht auf und locht:“Do hot se wea vü Oabeit gmocht.“.
A jeda hurcht, a jeda schaut, da tickt a Pendluhr so laut.
Des riesengroße Puppenhaus schaut oanfoch voi fantastisch aus.
Doch wia d‘Lilli nu daungsche sogn wü, san da Mau und sei Frau scho weg im Gewühl.
De Oma sogt:“I hobs do gwusst, is da jetzt a nu ned bewusst?
Da Bombmdienst, de Polizei! Boid kummt de nexte Schererei.
Mei, Mensch, des nimm jetzt i in d’Haund, du schaust guat aus,du host Vastaund!
Do deine Mauna! A Malheur! Mein Kind, a gscheida Mau muaß her!“
De Lilli schaut nua gaunz vakleat, sie hot de Oma gor ned gheat.
Des Diandl sitz hint drin und stroit, meakt ned amoi wia draußt da Schnee obafoid.
Auf d’Nocht da sitzns beim Kerznliacht, untam Christbam u. denkn drau wos nu gschiacht.
Da piepst nu des Handy, a SMS, da steht:ICH WÜNSCH EUCH EIN FRÖHLICHES FEST!
HAB DICH LIEB UND DENK AN DICH, HOFFE DU DENKST AUCH AN MICH!
4 TAGE NOCH, DANN KOMM ICH HEIM UND.RUTSCH MIT EUCH INS NEUJAHR REIN!“
A so a Freid, und jetzt is gwiss, dass des heit des schenste Weihnochtsfest is.
De Oma murrt kopfschüttelnd:“Wos kau des bringa?“ Do da heats de zwa nua mea STILLE NOCHT singa.


 Mundartdatenbank - Gesammelte Beiträge von Mundartautoren und Lesern zum Nachlesen!