Mundartbeitrag von:
Chmela Gunther -
D-83064 Großholzhausen
gunther@chmela.de
Alle Mundartautoren
Mundart-Datenbank |
A letzda Gschmog vo Summa
As Fuizngros wead goidan
Da Hoadara is scho vabliahd
As Puivahoiz trogd schwarze Beerl
Dia kloana Fean hànd gràb
Da Himme wiar a Buidl
So tiaf dees glànzad Blau
So weis wia Schnää dia Woikan
Und b’Beag hànd wia zun Greifa
Da Fehnwind moid de Landschafd
Da Fehnwind bringd de Weam
Oktobatog so liachd
Ois wàr’s oiwei no Summa
Schdààd is’s im Moos
A Gschmog von Torf
Schdeigd dar a d’Nosn
De warme Sunn schdähd tiaf
Da Bussard kreisd houch dromad
A kloane Schlang vaschlieafd si
Voa deine Fiaß a d’Hoad
Kàm dàsd as seng hosd kena
A Birkhenn fliagd davo
Aus sein Vaschtegg im Moos
Schaug du no rechd und schdäh
Du hosd as gwies vaschreggd
Du hebsd a Blàdl auf a gejbs
Vo dene Birkan neba deina
Lang schaugsd as o
Und dràhsd as a da Hand
Es wean boid mehra wean
De obafoin vom Bààm
Und oissam weans vageh
Und b’Birkan schdengan lààr
De Weam is g’lieha grod
Es is koa Summa nimma
Da Fehnwind wead boid gar sei
De warme Sunn wead weiß
Gäh hoam hoaz ei
Dia Nàchd dia wean etz koid
Es wead da Winta kemma
Dea bleibd da gwies ned aus
---------------------------------------------------------------------
Anmerkung
Als oberbayrischer „Ausländer“ - dankschön für die Gastfreundschaft! - bin ich mir nicht sicher, ob alle Wörter verstanden, bzw. erkannt werden. Daher hier einige Erläuterungen:
Fuizn (Filzen) = Hochmoor, Moos
Hoadara = Heidekraut
Puivahoiz (Pulverholz) = auch Faulbaum genannt (Frangula alnus)
Fean (Föhren) = Kiefern
gràb = grau
Gschmog (Geschmack) = Geruch
oissam = alle (eigentlich „alle zusammen“)
|
