AutorIn des Beitrages:

Da Pensionist!

A Pensionist is in Pension,
dos was a jeda schon.
Wia konn ma dos erkennen,
wonn ana soweit is,
sigst dos beim geahn oda rennen,
oda goar an sein Gebiß?
Frogn üba Frogn,
dos is a nit so leicht,
seint dos de, de ollweil klogn
oda is dos ana, der lei schleicht.
Dos konn man heinte goar nit sogn,
heint schleichn a de Jungen,
heint tuan de Jungen öftas klogn
und de Oltn seint schon g‘sprungen.
Heint bist mit fuchzig long schon Opa,
do war ma früha in Pension,
monche Oma kriagt an Popa
und dos is goar ka Illusion.
Und wos de oltn Zänt ongeaht,
do is heinte sicha gwis,
es laft so monches gonz vakeahrt
es hom Junge oft ka eigenes Gebiß.
Do hom de Rentna noch a Mähne,
dos haßt, se hom noch olle Hoar,
so moncha Junge hot lei mehr a gfärbte Strähne,
a scheane Glotzn oft sogoar.
Freilich zwickt’s und zwackt’s holt oft amol
und so monche Kronkheit is a Quol.
Oft liegt ana kronka auf sein Kissn,
dos muaß nit gonz Europa wissen.
Es hilft da kana, glab ma dos,
sog lei ollweil, mia geaht’s guat,
glab on di und nit on irgend wos,
donn geahn de Wewehchen wieda fuart.
Wonn bist Pensionist und wonn bist olt,
dos is hiaz de Frage,
ob an dos Rentnalebn gfollt,
oda is es mehr a Plage.
Olt is der, der olweil umasempat,
der dauernd jammat und sinniert,
der sei Zeit nutzlos vapleampat
und ollweil lei sein Orzt traktiert.
Wer ollweil lei on Kronkheit denkt
und jedn Tog fuchzehnmol stirbt,
wer Tog füar Tog om Sofa henkt
und Ondan noch den Tog vadirbt.
Der is schon ollweil olt gewesn
und weard dos imma sein,
der konn es Leben glei vageßn,
den sei Frau haßt Kronknschein.
Wer auße geaht in de Natur,
wer kreuzfidel und lustig ist
und nit jammat laut in ana Tour,
der is füar mi a echta Pensionist.