AutorIn des Beitrages:

Wia ´s Wetter, so ´s Lebn

Is ´s Wetter ah nit allweil heiter,
es geht ´s Lebn trotzdem ständig weiter,
es bleibt halt d´Zeit ganz gwiss nit stehn
und aufwärts muass´s schon wieder gehn.

Da Nebö nimmt da öfters d´Sicht,
a Missgschick über dih nuh bricht,
oft gibt´s an Sturm und Wind und Regn,
d´Welt fallt nit zsamm da gleih deswegn.

Vü dunkle Wolkn zoagn da an,
dass bald a Gwitter kemma kann,
wann aber uma ist erst d´Gfahr,
dann atmst auf und siahgst ganz klar.

An Schnee gibt´s zeitweis und an Frost,
d´Kält macht dih steif, du gspürst koan Trost,
doch wann d´Wärm zruck kimmt, d´Sunn scheint drauf,
da taut dann ´s Eis gleih wieder auf.

Es is mitm Lebn so wia mitm Wetter,
a Hoch und Tiaf, des kennt a jeder,
d´Sunn aber is für alle da,
´s Lebn zum Begreifn, des is schwa.