AutorIn des Beitrages:

Des Viech im Mensch‘n

Da Mensch is, des is eh bekannt,
in seine Tug‘ dem Viech vawandt:

Oft is er wia a Lampö brav,
dann bind’t er dir an Aff’n af,
er treibt van Wirt an Esel hoam
und wälzt se wia a Sau im Loam,

er pfeift, so wia da Spatz am Dach,
oft schiasst er a den Vogö ab,
füllt er se wia a Kuah den Schlund
und geht dabei fast vor de Hund‘.

Er glaubt, er war‘ stark wia a Stier,
vielleicht so wampert, kimmt ma via,
arm is er wia a Kiramaus,
geht eam des Geld af amoi aus.

Do gar so falsch ois wia a Schlang‘
is net a jeder, Gott sei Dank,
vielleicht grad, wia a Fuchs so schlau
und iawand eit’l wia a Pfau.

Und hi und da is er so bled,
ois wia de Heanna af da Gräd‘.