AutorIn des Beitrages:

Wia se de Leit‘ de Zeit vatreib‘n

A niada Mensch braucht was zan Toan,
is’s mit Kolleg’n oda alloa,
wia se de Leit de Zeit vatreib’n
des möcht‘ i eng hiazt umareib’n:

Da Koartnspüla tuats ban Kartl’n,
da greana Daum, der tuats ban Gart’ln,
da Bergsteiger tuats af’n Berg,
da Höhl‘nforscha inta da Erd‘,
da Fäule, ja, der macht‘s ban Schlaf’n,
da Neigierige ban Schau‘n und Gaff’n,
da Sauffade, der tuats ban Wirt’n,
de Hirtabua, der macht‘s ban Hiat’n,
des liabe Madl tuats ban Buam,
da Muezzin, der macht‘s am Turm,
da Arwata in da Fabrik,
da Schaffner tuat seins in de Züg‘,
da Pfarra tuats in Beichtstuih drin,
da Dokta mit da Medizin,
da Liefarant macht’s mit sein Wag’n,
da Angla mit’n Widahag’n,
da Fuaßballspüla afn Ras’n,
da Märchenprinz macht’s mit de Has’n,
da Heiratsschwindla mit de Frau’n,
da Spanna, der macht’s mit de Aug’n,
da Bau‘ tuats mit’n Kreislheia,
da Rauchfangkehra mit’n Feia,
da Fleischhacka, der tuats ban Wurscht’n –

I hear hiazt af, bin am Vadurscht’n.