AutorIn des Beitrages:

Wia’s zuageht in da Nacht


Am Anfang legt ma se am Buckö
und macht se unter’m G’nack an Mugö
aus Poistern, dass ma hecha liegt
und koane Raufla va sich gibt.

Und wird’s dann recht, draht ma si um,
die Seit’nlag‘ is gar net dumm,
vorm Weggaschlaf’n, wia i moan,
ziagt ma in Fuaß an, g’rad den oan,

dass ma stabül af d’Seit’n rollt
und guat zan Lieg’n kimmt, wia ma soll’t.
Der oane schnarcht ganz leis und sacht,
der and’re, dass’s an Rumpla macht

a niads mal, ois gang‘ d’Welt zugrund,
ob’s and’re stört, des stört koan Hund.
Der oan‘ tuat mit da Zung‘ an Schnalzer,
schreckt er de Leit‘ af, spült‘s koan Walzer.

Dann gibt’s oan, ja, dem g’heart de Goaß’l,
der laßt ba jed’n Ruck a Schoaß’l,
daß d’Luft zan Schnau’n wird dünn und gar
und er nach Luft schnappt wia a Narr.

So geht’s hoit rund, do is‘s koa Jammer,
wanns net ganz stüll is in da Kammer,
weu war’s ganz stad, hätt‘ ma valor’n,
dann war‘ uns oana aussa g’storb’n.