AutorIn des Beitrages:

Müchweiß

Dei müchig weiße Haut,
de hât ma so guat gfâlln.
De hât mi glei umghaut,
du Feschaste von âlln.

Mi hât's so zuawezogn -
dei Herz hât viarablitzt -
so sche ois wia a Bogn,
aus Elfenboana gritzt.

Do woit i di glei druckn,
hâlsn, bussln, hâltn -
mi zu dir zuawehuckn,
mi mit dir untahâltn.

I war vor Ângst fâst gstorbn,
des Gfüh hâb i net kennt.
Hâb trotzdem um di gworbn,
wei in mir hât's so brennt.

Es hât so brennt nach dir,
voi Sehnsucht und Valângen.
Jetzt endli bist bei mir,
jetzt gspiar i deine Wângen -

und ah dei weiße Haut,
so sauba und so hell -
a jeda Fleck vatraut,
a jede klanste Stell.

Du bist so gsund, voi Lebn -
so frisch wia Morgntau.
Nie darat i di hergebn,
fiar a braungebrânnte Frau.