AutorIn des Beitrages:

Kobernaußerwald

Kobernaußerwoid, Kobernaußerwoid
aus dein Hoiz ham s mei Wiagn hergstoit;
oft moan i, mi a.
Als Waldzeller bin i geborn,
drum bist ma zur Hoamat worn.
Ohne di, da waar's laa(r).

Kobernaußerwoid, groußer Woid,
der guat dreißgtausend Hektar zoit (zählt)
mit'n Hausruck- oan Schlag.
Du glangst vo Mattighofn weg
in oan enz-groußn Fleck
bis umi af Haag.

Kobernaußerwoid, schena Woid;
d Früahlingsunn weckt di boid,
deine Bam gehn an Saft.
Ziagst schnell dein grean Janker o,
strotzt wia a junga Mo(nn)
vor lauta Kraft.

Kobernaußerwoid, reicha Woid,
wann a d Summasunn abaknallt,
deine Quelln rinnan kuih.(kühl)
Schmale Grabn ziagn tala(b),
wachsn zsaum zu an groußn Ba(ch),
der treibt s Radl vo da Muih. (Mühle)

Kobernaußerwoid, Zauberwoid,
dei Laubat, dös glanzt, wia Goid,
wann d Hörigstsunn lacht.
Bis dann da Anrein (Rauhreif) kimmt,
der s wieda abanimmt,
dö schene Pracht.

Kobernaußerwoid, Winterwoid,
schau wia da Schnee abafoit;
scho deckt er di zua.
Dö Gloaster vo meinö Schi
reibn si zur Schranna hi.
Rundum nur Ruah.

Kobernaußerwoid, Hoamatwoid
und weil s ma da gar so gfoit
wirds ums Herz mir so woarm.
Solang i nu s Gehn vermag,
kimm i zu dir, schier jedn Tag.
Du, mei Dahoam.