Publikationen


Der beste Beitrag wird als "MundArt des Monats" auf dieser Seite und auf www.eurojournal.at veröffentlicht!

Semrau Michael

Einkaufn

MundArt des Monats Mundart-Autoren Neueinträge
Beitrag anmelden


AutorIn des Beitrages:


Semrau Michael
3423 St. Andrä
michaelsemrau@aon.at

Zurück

Einkaufn

So ob und zu passiert es mir,
Doß i den Einkauf moch stott ihr.
Gonz ehrlich gsogt, is des recht häufig.
Und do geschieht's, doß i beiläufig
Beobocht, wie vaschiedn san
Die Fraun, vaglichn mit'n Mann.

Da Monn, wenn er den Auftrog hot,
Doß er beschofft des täglich Brot,
Hot er an Zettl von da Frau:
Darauf is g'schriebn gonz genau,
Wos heit füa eam zu kaufn wär.

Eam foit des donn a goa net schwea:
I'n Korb haut er die Sochn eine,
Diskussionen gibts do keine.
Und ruckezuck, do geht er schon
Zur Kassa, zoit und rennt davon.

A Föhlaquelln gibt es nua,
Die d'Frau kennt bringen aus da Rua:
Eastens: konn sein, er bringt wos net,
Obwoi es groß am Zettl steht.
Zweitens: ea kauft no iagendwas
Weu's büllig is, und sei's a Schas.

Soweit die graue Theorie -
Denn gonz so afoch is es nie.
Weu wenn sie schreibt am Zettl drauf,
Doß i wos von da Feinkost brauch,
Waß i: Au weh, des wird net ohne,
Denn d'Feinkost is die Todeszone.

I hob nua a Faschiates woin,
Doch iagendwie hot's net sein soin.
Wie i zua Budl geh und schau -
Oh jessasna, do steht a Frau.

Sie plaudat, ongeregt sogoa,
Wie schen des Wochnende woa,
Wos kocht hot und wie guat es schmeckt,
Wenn's Salbei in a Schnitzl steckt.

I räuspa mi und schau sie on,
So bes ois wia i grod nua konn.
Unwillig kommt sie donn zua Soch':
'I übaleg, wos i heit koch'
Sogt sie donn zua Vakeiferin.
Zöht auf, wos sie so hätt' im Sinn,
Und wöches Fleisch do ka'm in Froge -
Recht ausfüahlich erörtert's d'Loge.

Bis sie donn endlich etwos kauft,
Roits mia die Zechnnägl auf.

I denk: die muaß i übahoin
Bevua's zua Kassa kummt zum zoin.
Doch wie i nimm a Tragl Bia,
Is sie scho wiederum vua mia.

Aufs Bandl legt's die Sochn drauf
Die Kassa listet olles auf.
Ins Wagerl kummt es eine jetzt,
Donn geht's ans zoin, zugutaletzt.

Ihr Toschn is im Wagerl drin -
Gonz unten, denn durt g'hert sie hin.
Sie schlicht die Sochn umanond,
Bis d'Toschn endlich hot zua Hond.

Des Börsl suachts und mocht es auf,
Sie wühlt herum und kummt donn drauf,
Doß Göd net reicht - wie ärgalich !
Füa sie, doch leida a füa mich.

Wie sie donn schaut so desparat,
Knurr i: 'Zoin's hoit mi'n Bankomat !'
Bis sie die Koatn endlich hat,
Bin i scho knopp vuam Heazinfarkt

In Schlitz steckt sie die Koatn eine -
Vakeahrt natürli - i hätt g'wett' !
Und brennhaß schiasst's in Hian ma eine:
'Oh Gott, den code waß sicha net !'

Oh Wunda, dem woa doch net so,
Und iagendwie woa i a froh:
Denn an's hob i scho übalegt -
Des hätt sie nimma übalebt !

 Mundart-Datenbank - Gesammelte Beiträge von Mundartautoren und Lesern zum Schmökern!