Publikationen


Der beste Beitrag wird als "MundArt des Monats" auf dieser Seite und auf www.eurojournal.at veröffentlicht!

Semrau Michael

Asozial

MundArt des Monats Mundart-Autoren Neueinträge
Beitrag anmelden


AutorIn des Beitrages:


Semrau Michael
3423 St. Andrä
michaelsemrau@aon.at

Zurück

Asozial

Monchmoi denk i: bin i a Weh,
Weu i so vüles net vasteh!

Denn wenn i heit a Zeitung nimm,
Steht ollaweu wos drüba drin
Von Krise und Spekulation,
Von Öl und Aktientransaktion.

Die Kurse sausn rauf und runta,
Da Dow Jones treibt es imma bunta,
Wie gibts des, doß a Firma heit
Mi´n söbn Gschäft und gleichvü Leit
20 Prozent on Wert valiert ?
Und doß des keinen Menschn stiat ?

Des is do kronk und net real -
Wieso is uns des scheißegal ?!
Is des, weu iagendwie fost olle,
Sö´m drinnansitzn in da Folle
Und mit die Aktien spekuliern ?
Konn uns darum nix irritian ?

A neie Schicht von Asozialen
Tauscht´s Lebn mit´n Irrealen:
Die nennan si „Investmentbanker„ -
Die soi si hoin glei da Henker.

Ruiniern die Firmen und die Leit
Und sprechen schön und oberg´scheit.
Die Totngroba sans von oin -
Und wir lossn uns olles gfoin.

Solong sie kräftig obkassiern,
Derf sie da Stoot net irritian.
Doch wenn sie´s hobn donn vabockt
Weu´s gonze Göd bled hom vazockt,
Donn jamman sie: „da Stoot muaß her!
Na, jetzt gehts ohne den net mehr!“

So zoist du zwamoi Deppnsteua:
Zueast, weus´d kaufst die Sochn z´teua
Mit die die Herrn do spekuliern.
Und zweitens, wenn sie´s Göd valiern
Schiabst du ois Steuazohla noch -
Do bist amoi zuvü s’Oaschloch....

Gewinne wer´n privatisiert
Und Pleitn wer’n sozialisiert.
Des is des Credo diesa Gfrasta
Moßlose Gier, des is ihr Lasta.


Doch sie san niemois des Problem:
„Wir ? Na ! Des is s´System!“
Und diesen Schwochsinnsmonolog
Den gibts seit ewig und drei Tog....

Genau wie domois is es heit:
Am Schreibtisch sitzn diese Leit
Erfülln brav nua ihre Pflicht -
Gewissensnotstond gibt es nicht.

So cool is s´spekuliern mi´n Essn -
Die totn Nega ? Zum vagessn !
Minutiös erfülln´ den Plan
Bis d´Leit nix mehr zum Fressn ha´m.

Da Biosprit im Es-Ju-Wi
Schont dafüa dÚmwöd wie no nie !
Wir san so effizient - und schlimma
Wie d´Gaskomman - die brauch ma nimma !

Hygienischa und elegant
Stirbt si´s mit Mais in unsam Tank.
Is eh so weit furt, dieses Graun,
Do konn ma leichta weggaschaun....

Zeit is, doß d´G´söschoft endli sogt:
„Mit nosse Fetzn g´herns vajogt!“
Und doß a Totn foig´n den Wortn -
Gonz eahlich: i konns kaum dawoatn !

Doch iagendwie glaub i net dran,
Weu spekuliern so vüle tan.
Die Gier noch no mehr is´s Problem -
Do konns jo goa ka Lösung ge´m !

Nua:
Wer mitmocht, der hot´s Recht vagebn,
Si üban Hitla aufzuregn....

 Mundart-Datenbank - Gesammelte Beiträge von Mundartautoren und Lesern zum Schmökern!