AutorIn des Beitrages:

De Wintazeit

Heit in da Fruah woars wia im Märchen
im tiafn Schee hod tobt mei Hundepärchen
dicke Flockn vom Hümmi tanzn
da Wind nutzt do seine Chancn

waa ned des Foahrn in dOarbeit gwen
a Spaziergang mei wia schen
zwoanzg Zentimeter Schnee
üwa Wiesn und Föda ih tat gern geh

So owa nimm ih den Besn in dHand
setz hoid do ein mein Vastand
putz des Auto ob ganz gschwind
und schau das ih den Weg in dFirma find

An 30er foahrt mei Vordamann
am liaban waas ma wann ih eam anschiebn kann
grod das a in da Kurvn ned steht
mei wia do de Zeit vageht

Stott ana hoibn Stund Foahrtzeit
foahr ih scho fost zwoa und hob nu so weit
zum Telefon wird griffn
da Chef hod auf dEntschuidigung pfiffn

Wos stehst den ned friaha auf
mit der Frog legt a zu mein Ärga nu a Schäufal drauf
anstatt zfoahrn hinta den Offn
hätt ih liaba nu a Stund gschlofn

Bei so an Weda an frein Tog
des waa weit schena ohne Frog
ausspanna und de Natur anschaun
des tat ma heit wirkli taugn

So sitz ih im Büro und schau durchs Fensta zua
wia spün im Schnee de Nochbarsbuam
bis zum Obend hams an Schneemann baut
der hod ma dann beim Hoamgeh noch gschaut

So vageht a schena Wintatog